الثلاثاء، 9 يوليو، 2013


ناس تعبانة و ناس شمتانة وناس محدش حاسس بيها

ناس تقول دي مجزرة
وناس تقول لااااااا .. الجيش كان بيدافع عن نفسه

...
ناس تقول كانوا بيصلوا الفجر
وناس ترد : لااااااا .. كل الفيديوهات والنهار طالع

ناس تقول أطفال ونساء اتقتلوا
وناس تقول مفيش ولا طفل ولا سيدة ماتوا

ناس بتنشر صور لناس ماتوا وهما بيصلوا
وناس تكذّب الصورة بصورة وتقول انها من سوريا

ناس بتستغيث
وناس تقول كنا بنستغيث في محمد محمود والإخوان باعونا

ناس بتتكلم .. وناس بترد عليها

ناس بتبكي وناس فرحانة وناس زعلانة وناس شمتانة

 


كل ده كلاااااام .. يومين وهيتنسي

اللي مش هينسي
كل أمّ .. قلبها مفطور دلوقتي علي ابنها اللي راح.. مش هتشوفه تاني
كل أسرة .. العائل الوحيد لها مات خلاص
كل أب .. الابن الوحيد اللي كان هيتسند عليه راح ومش هيرجع تاني

..................................

الناس دي آخرها منّنا صورة بروفايل أو صفحة ع الفيس

لو استقرّ الوضع .. هيفرح كل الناس اللي عملت ثورة وشالت مرسي
لو مرسي رجع .. هيفرح كل اللي في رابعة وهينسوا اللي مات

لاااااا طبعا مش ممكن ننسي؟
لا هتنسي .. صدقني .. أصل إحنا كمان نسينا اللي مات في محمد محمود
 
وفي الآخر هقولك .. عمرك ما هتشوف ابن البرادعي او ابن حمدين مصاب
عمرك ماهتشوف ابن مرسي ولا ابن البلتاجي ولا ابن المرشد قتيل

في الآخر دول بيلعبوا سياسة
وإحنا اللي بنموت بجدّ .
 
( منقول)

 
 
 

 

ليست هناك تعليقات: