الاثنين، 21 نوفمبر، 2011



الأحد، 20 نوفمبر، 2011

مالك يا أبن بلدي هو أنت قالب وشك ليه؟.... مش أنت يوم ما الثورة قامت قلت هيييييه؟ ورقصت في الشارع وقلت بقينا أحرار يا بيه ....وأنت أصلاً محدش قالك حرية يعني أيه وأن الحرية مش بس حقك اللي تفضل تدور عليه .....وبعدين تنسي واجبك واللي عليك ماتفكرش فيه وترجع بعديها تستغرب البلد ماتغيرتش ليه .................طب أسمحلي أقولك يا سيدي من يوم الثورة عملت ايه ......عملت باسم الثورة كشك عشان تبيع سجاير ولزقت ستيكر الشهدا بتوع 25 يناير اللي الفكيييك اكتشف أنهم ماتوا في أحداث يناير..... وعالأرض الزراعية قلت فرصة وبنيت عماير...... وعملت الثورة لحاف ومش بعيد تعمل ستاير .....يبقى الثورة قامت علشان الفلوس مش للضماير..... كأنك لبست بنطلون ونسيت تقفل الزراير................ بعد الثورة أنت قلت كلام كتير ميه ميه ...قلت البلد دي بلدي وهشيلها جوة عينيه... وعشانها هتغير عشان مصر البهية.... لكن كانت المفاجأة أن أخلاقك هيه هيه.... وكلها كام يوم ورجعت ريما لعادتها الأولانية.... وبقيت تشكي من البلطجة وأحنا كلنا بلطجية..... أصل أحنا أحسن ناس تصقف و أجدع مطبلاتية... تكونش فاكر الفهلوة هتاخدك للعالمية؟.... ده مفيش بلد بتتقدم و أغلب سكانها فهلوية............ ده أحنا عشان نتقدم عايزين عزيمة قوية... وأتفرج عاليابان وشوف خيبتك القوية.... يضربها نووي، اعصار، بركان وبرده واقفة عفية.......... واحنا بلدنا تولع عشان عيل عاكس ولية....... آه لو تخلى عندك دم و تبدأ بنفسك.... بشوية أحساس بالمسؤلية واللي بيقولك الكلام ده مش واحد من الفلول... زى ما بتقول !! صدقني أنا طول عمرى اكتر منك مسحول ... يمكن أكون ساذج ، او يمكن أكون مخبول او حتى مسطول بس اللى انا متأكد منه ... اننا لما نظلم نفسنا و نخرب بلدنا ، أهو ده اللى مش معقول !!


- منقول -