الخميس، 21 فبراير 2013

قال دفعة 2005 قال !!!

النهاردة جه عندنا في الشغل واحد جديد ...راجل محترم شكله عنده 48 او 50 سنة..باين عليه بيشتغل بقاله سنين كتير وقلت في بالي ده اكيد منتدب من مكان تاني او نقل تعينه عندنا ... المهم بعد حديث بعض الزملاء معاه ..عرفنا انه كان شغال في الصحافة ..بس هو فضل يجي عندنا .. معرفش ايه اللي خلاه يفكر يجي المخروبة بتاعتنا دي او مين الشخص اللي بيحبه اوي كده وشار عليه الشورة المهببة دي ... كل ده مش مهم ... المهم الصدمة الاولي اللي عرفناها انه جاي تدريب يعني من غير تعين ومش هيقبض اي مرتب ... بقي راجل زي ده بقاله خبرة في مجاله مش اقل من 20 سنة يقبل يجي تدريب بس.... وبعد ما شرب الشاي سالته ليلي زميلتنا هو حضرتك خريج سنة كام؟ ونزل علينا الجواب كالصاعقة ...انا دفعة 2005 ......هه !!" ده رد فعلي علي الخبر .. بتقول كككككم اذا كنت انا دفعة 2001 طبعا الحوار ده في سري.. وقمت جريت علي الحمام وبصيت في المرايا اشوف شكلي فيها ... اقول ايه ده هو انا كبرت اوي كده... اذا كانت الدفعة اللي اصغر مني شكلها كدة امال انا ابقي عاملة ازاي... تاني يوم كنا قاعدين وجت زميلتنا علا وهي في نفس مجال تخصصه .ماكنتش حضرت اليوم اللي قبله وتعرفت عليه...فبعد مامشي هي كمان اخدت شنطتها وقالت انها هتقوم تروح.. وقبل ماتمشي سالت ليلي هو اللي كان هنا ده مين ... رديت ليلي ده متدرب جديد ..علا بدي عليها الاسبهلال لوهلة وقالت معقول رجل كبير كدة ولسه متدرب .. فرديت ليلي قالت لها ده دفعة 2005 .. وهنا بقي مقدرتش علا تمسك نفسها وبقيت انا اسندها من ناحية وليلي من الناحية التانية .. وهي بتصرخ في وشنا كم لييييييه 2005 ده ايه.. اصغر مني يعني..مش ممكن ده تلاقيه كان بيعيد السنة كتير... و قامت تروح وهي يا عيني بتكلم نفسها: قال دفعة 2005 قال.... بعد شوية جت زميلة تالتة .عرفت الموضوع وقامت جري اول ماعرفت انه دفعة 2005 .. بس انا طبعا عرفت هي قامت علي فين لاني عملت زيها اول يوم ... انا مش عارفة ايه يعني مشكلة 2005 يمكن المشكلة في رقم 5 لو كان قال 2006 كانت مبقتش مشكلة ...جايز عندنا حساسية من رقم 5

ليست هناك تعليقات: